Bogi Bjarnason, blaðamaður og frisbígolfari, sem um tíma var strandaglópur í Mið-Ameríkuríkinu Níkaragva, kom heim í vikunni eftir 69 klukkustunda strangt ferðalag.
Þegar við skildum við Boga á þessum vettvangi fyrir viku hafði hann þurft að framlengja dvöl sína í Níkaragva um tæpa viku fyrir þær sakir að honum var ekki hleypt til Bandaríkjanna en þar í gegn átti hann að fara á leið sinni heim til Íslands. Í staðinn fann Bogi flug til Amsterdam í gegnum Mexíkó um síðustu helgi. Þaðan flaug hann til Lundúna á mánudaginn og loks heim með British Airways á þriðjudaginn.
„Það tók mig um það bil 69 klukkustundir að komast til Keflavíkur eftir að ég lagði af stað frá San Juan del Sur klukkan sjö á laugardagsmorgun,“ segir Bogi. Ekki gekk þó ferðalagið hnökralaust fyrir sig. „Á Amsterdam-London-leggnum var aftur reynt að hefta för mína en Bretarnir ætluðu í fyrstu ekki að hleypa mér inn í landið nema ég ætti tengiflug samdægurs. En þetta bjargaðist.“
Bogi fór að vonum þráðbeint í tveggja vikna sóttkví við heimkomuna. Myndir úr ferðalaginu má skoða á vefsíðu hans: bogibjarnason.com/gallery.