Fyrir nokkrum dögum var í fyrsta skiptið sjúklingur sem veikst hefur af COVID-19-sjúkdóminum fluttur á milli gjörgæsludeilda í svokölluðu einangrunarhylki. Var sjúklingurinn fluttur á milli gjörgæsludeildar á Landspítalanum í Fossvogi og gjörgæsludeildar við Hringbraut. Með flutningi í slíku hylki, sem kallað er „húdd“ er komið í veg fyrir smit milli sjúklings og annarra við flutninginn.
Á facebooksíðu Landspítalans er greint frá því að mikill viðbúnaður hafi verið vegna flutningsins. Gætt er að öryggi sjúklings við flutninginn með þar til gerðum öryggisbúnaði eins og loftflæðis- og loftgæðanemum, festingum á hylkinu við notkun og öryggisbeltum fyrir sjúklinginn.