Gæsluvarðhald yfir eiginmanninum framlengt
Setja bókamerki
Karlmaður á sextugsaldri sem setið hefur í gæsluvarðhaldi síðan frá 2. apríl, eða frá því krufning á líki eiginkonu hans leiddi í ljós að andlátið hefði líklega borið að með saknæmum hætti, verður áfram í gæsluvarðhaldi til 22. apríl.
Héraðsdómur Reykjaness samþykkti kröfu lögreglustjórans á Suðurnesjum um áframhaldandi gæsluvarðhald yfir manninum í gær en þá rann fyrsti gæsluvarðhaldsúrskurðurinn yfir honum úr gildi.
Þetta segir Ólafur Helgi Kjartansson, lögreglustjórinn á Suðurnesjum, í samtali við mbl.is og bætir því við að rannsókninni miði vel miðað við allar aðstæður.
Eiginkona mannsins lést á heimili þeirra hjóna í Sandgerði 28. mars en maðurinn var ekki handtekinn fyrr en 2. apríl eftir að krufning leiddi í ljós að andlát hennar hefði líklega borið að með saknæmum hætti.
Þetta mál er annað tveggja andláta sem lögreglan hefur til rannsóknar þar sem grunur er um heimilisofbeldi. Karlmaður á þrítugsaldri var úrskurðaður í gæsluvarðhald til 17. apríl vegna rannsóknar á andláti móður hans sem var á sextugsaldri í Hafnarfirði aðfaranótt 6. apríl.
Karl Steinar Valsson, yfirlögregluþjónn hjá lögreglunni á höfuðborgarsvæðinu, segir að ákvörðun um það hvort óskað verði eftir áframhaldandi gæsluvarðhaldi yfir manninum verði líklega tekin á morgun.
Frambjóðendur skila inn listum í Hörpu
Bergnuminn í Hvalfirði
Kaldasti veturinn kom að óvörum
Þyngri refsing fyrir að nauðga stjúpdóttur æskuvinar
Mál hjúkrunarfræðingsins fer aftur fyrir héraðsdóm
Banna mengandi búnað sem leyfður er á Íslandi