Um það bil hundrað og fjörutíu manna lið björgunarsveita af Austur- og Norðausturlandi auk Landhelgisgæslu og lögreglu hafa verið við leit í dag að skipverja sem talinn er hafa fallið fyrir borð af fiskiskipi á leið þess til hafnar í Vopnafirði í gær.
Aðstæður hafa verið góðar, hægviðri og gott skyggni, að því er fram kemur í tilkynningu frá lögreglu.
Björgunarbátar og -skip hafa verið notuð til leitar, drónar og flugvél Landhelgisgæslunnar auk neðansjávardróna. Fjörur hafa verið gengnar beggja vegna fjarðarins og svæði tvíleituð.
Allur fjörðurinn innan tanga var fínkembdur á sjó og landi. Auk þess var leitað svæði sem markast af Selnibbu að norðan og Flös í Kollumúla að sunnan.
Leit stendur enn yfir en gert ráð fyrir að henni ljúki fljótlega. Henni verður fram haldið á morgun og mun björgunarsveitin Vopni annast hana næstu daga og fram að helgi. Stefnt er þá að fjölgun í leitarliði að nýju. Ákvörðun um framhald leitar, hafi hún ekki borið árangur, verður þá tekin.