Reyjavíkurborg hefur auglýst húsnæði sem hýst hefur vistheimili að Víðinesi til leigu. Heildarstærð hússins er 2042,1 fermetrar. Haldið hefur verið í upprunalegar innréttingar og herbergjaskipan.
Þetta kemur fram á vef Reykjavíkurborgar.
Eignin samanstendur af þremur samtengdum húsum sem eru öll til leigu. Innan þeirra eru um 30 stór herbergi, ásamt þjónusturýmum og eldhúsi. Eitt húsið er á tveimur hæðum en hin eru á einni hæð. Borgin gerir ráð fyrir því að leigutími verði ótímabundinn með 12 mánaða gagnkvæmum uppsagnarfresti.
Reykjavíkurborg lagði um 120 milljónir kr. í endurbætur á húsnæðinu árið 2016.
Eignaskrifstofa Reykjavíkurborgar annast útleigu og býður til skoðunarferðar um eignina miðvikudaginn 23. september, frá klukkan þrjú til fjögur síðdegis.