Séra Geir Waage hættir og brýnir þjóðkirkjuna

Séra Geir Waage lætur af embætti um áramótin eftir 42 ár sem sóknarprestur í Reykholti en hann varð sjötugur í vikunni. Eiginkona hans, Dagný Emilsdóttir, hætti sem móttökustjóri Snorrastofu um síðustu áramót.

Hjónin eru flutt út úr prestssetrinu og í glænýtt húsnæði í Reykholti enda geta þau ekki hugsað sér að búa annars staðar. Þau kvíða ekki verkefnaskorti enda eiga þau sjö barnabörn og vænt bókasafn. Þá á skógrækt í Reykholti hug þeirra allan.

Í viðtali í Sunnudagsblaðinu rifja þau upp árin í Reykholti en mikil uppbygging hefur átt sér stað á þeirra vakt. Árið 1996 var ný kirkja vígð sem leysti þá gömlu af hólmi. Séra Geir kveður kirkjustjórnina með brýningu enda hafi þjóðkirkjan átt í vanda frá því á tíunda áratugnum. „Þegar hún ofurselur sig tíðarandanum, sem undir eins líður hjá, verður hún ekki annað en rekald á annarlegri strönd.“