Munum saman koma sterkari út úr kófinu

„Árið hefur verið erfitt en samfélagið hefur sýnt mikinn styrk og úthald. Við munum saman koma sterkari út úr kófinu,“ segir Katrín Jakobsdóttir, forsætisráðherra og formaður VG, í áramótagrein í Morgunblaðinu í dag.

„Jarðhræringar, snjóflóð, skriðuföll, efnahagskreppa og heimsfaraldur sem kallaði á samkomutakmarkanir sem aldrei höfðu verið settar áður í lýðveldissögunni; allt markaði þetta árið sem er að líða. Ár sem reyndi á samfélagslega innviði á öllum sviðum. Ár sem reyndi á almannavarnir og björgunarsveitir, heilbrigðiskerfið, menntakerfið, atvinnulífið og velferðarsamfélagið. En líka ár sem kallaði fram styrk og hugrekki íslensks samfélags," segir Katrín m.a. í greininni. 

„Frá því að faraldurinn skall á hafa stjórnvöld haft tvö skýr markmið. Í fyrsta lagi að vernda líf og heilsu landsmanna. Í öðru lagi að gera það sem til þurfti til að lágmarka samfélags- og efnahagsleg áhrif faraldursins. Með þessi markmið að leiðarljósi höfum við tekist á við hverja áskorunina á fætur annarri og stöndum uppi nú í lok árs sem sterkt samfélag sem náð hefur markverðum árangri í baráttunni við faraldurinn.“