Óvissustig vegna snjóflóðahættu á Vestfjörðum

Óvissustig er í gildi vegna snjóflóðahættu.
Óvissustig er í gildi vegna snjóflóðahættu. Ljósmynd/Róbert Schmit

Veðurstofa Íslands hefur lýst yfir óvissustigi vegna snjóflóðahættu á norðanverðum Vestfjörðum. Nokkur minni snjóflóð hafa fallið, einkum í Skutulsfirði en einnig í Súgandafirði, þótt ekkert þeirra hafi verið ofan byggðar og ekkert náð niður á veg. 

Hins vegar er hætta á að snjóflóð geti fallið á vegi, svo sem í Súðavíkurhlíð, Eyrarhlíð og á Flateyrarveg svo fátt eitt sé nefnt. Er því fólk hvatt til þess að vera ekki á ferðinni á milli byggðakjarna að nauðsynjalausu.

Lögreglan telur ekki að hætta sé á ofanflóðum ofan byggðar á Vestfjörðum. 

Óvissustig vegna snjóflóðahættu felur í sér aukinn viðbúnað snjóflóðavaktar Veðurstofunnar og snjóathugunarmanna ásamt samráði við lögreglu og almannavarnir í héraði vegna snjóflóðahættu sem upp kann að koma í byggð. 

Skíðasvæðinu upp á Seljalandsdal var lokað fyrir skömmu og veginum þangað upp eftir þar sem snjóflóð hafa verið að falla niður hlíðina ofan þess vegar. Athugað verður með opnun vegarins í fyrramálið, að því er segir í Facebook-færslu lögreglunnar á Vestfjörðum.

 

 

mbl.is