Landsmenn búa sig nú margir undir ferðalög en hvítasunnuhelgin nálgast óðum. Verða því eflaust margir fegnir að heyra að búist verður við mildu veðri um helgina. Hiti verður víðast 5-10 stig. Ekki er búist við hellidembum en þó gæti komið stöku skúr.
Samkvæmt upplýsingum frá Veðurstofu Íslands verður bjart víða um land á föstudag en útlit fyrir skúrir á suðurströndinni og höfuðborgarsvæðinu. Á laugardag kemur hlýrra loft inn og lítur út fyrir að hlýni norðaustan til og hiti gæti farið upp í 9-10 stig.
Lítil breyting verður á sunnudeginum, áfram væta fyrir sunnan en austlægari átt. Á mánudag verður hægur vindur og stöku skúrir en bjart fyrir norðan.