Götubitahátíð Íslands 2021 fór fram síðustu helgi í Hljómskálagarðinum þar sem var haldin keppnin Besti götubiti Íslands í samstarfi við European Street Food Awards.
„Þetta heppnaðist framar vonum, svona miðað við að veðrið var okkur hliðhollt þarna á laugardeginum, sem var í rauninni það eina sem við óskuðum eftir, að fá þarna einn sólríkan dag,“ segir Róbert Aron Magnússon, framkvæmdastjóri hátíðarinnar.
Dómnefnd skar úr um úrslit eftirtalinna flokka, Besti götubitinn; Besti grænmetisrétturinn og Besti smábitinn, og svo kaus almenningur um Götubita fólksins.
„Svo var þarna keppnin Besti götubiti Íslands í samstarfi við stærstu götubitahátíð í heimi, European Streetfood Awards. Þar sigraði Silli kokkur sem besti götubitinn annað árið í röð,“ segir Róbert.
„Það var almenn götubitahátíðarstemning í Hljómskálagarðinum, sem var ný staðsetning í ár sem var frábært að prófa.“ Áður hafði götubitahátíðin verið haldin á Miðbakkanum síðan hátíðin var sett á laggirnar árið 2019. Róbert sagði nýju staðsetningu hátíðarinnar smellpassa.
Dómnefndina skipuðu Óli Óla veitingamaður, Binni Löve áhrifavaldur, Helgi Svavar matgæðingur, Shruthi Basapa frá Grapevine og Sefanía Thors húsmóðir.
Alls tóku 20 aðilar þátt í keppninni og yfir 15.000 manns mættu á hátíðina.
Niðurstöðurnar eru eftirfarandi:
Besti götubiti Íslands 2021 (Top 3)
1. Silli kokkur
2. Reykur BBQ
3. Just Wingin It - Vængjavagninn
Besti grænmetisrétturinn 2021
Chikin
Besti smábitinn 2021
Chikin
Götubiti fólksins 2021
Just Wingin It – Vængjavagninn