Alls greindust 122 kórónuveirusmit í gær og þrjú smit á landamærum, þetta staðfestir Hjördís Guðmundsdóttir, upplýsingafulltrúi almannavarna, við mbl.is.
Fyrr í dag var gefið út að 115 smit hefðu greinst innanlands og eitt á landamærum en þá kom fram að möguleiki væri á að þær tölur gætu hækkað þar sem metfjöldi sýna var tekinn í gær.
Alls eru nú 852 í einangrun og 2.243 í sóttkví. Sjö eru á sjúkrahúsi.
Fjölmörg sýni voru tekin innanlands í gær. 4.454 sýni voru tekin við einkennasýnatöku, 506 sýni voru tekin á landamærunum og 1.481 sýni var tekið við sóttkvíar- og handahófsskimanir. Fleiri sýni hafa ekki verið tekin frá því að faraldurinn hófst hér á landi.
Hlutfall jákvæðra sýna heldur áfram að lækka og var 2,27% í gær en 3,73% í fyrradag.