Lækkandi hjúskapartíðni á flestum Norðurlöndunum

Á tímabilinu 2010 til 2019 lækkaði hjúskapartíðni í Noregi, Finnlandi og Svíþjóð á meðan hún hækkaði yfir sama tíma á Íslandi. Á Norðurlöndunum er hjúskapartíðni hæst í Danmörku eða 5,3 á hverja 1.000 íbúa árið 2019. Lægsta hjúskapartíðni er í Finnlandi og Noregi eða um 4 hjónavígslur á hverja 1.000 íbúa.

Þetta kemur fram í tilkynningu frá Hagstofu Íslands. Þá kemur einnig fram að skilnaðartíðni sé svipuð í nágrannalöndum okkar þar sem hún var 1,8 á hverja 1.000 íbúa í Danmörku og 1,9 í Noregi árið 2019.

Skilnaðartíðnin var þó aðeins hærri í Svíþjóð eða 2,5 á hverja 1.000 íbúa og í Finnlandi eða 2,4. Til samanburðar voru 2,0 lögskilnaðir á hverja 1.000 íbúa á Íslandi árið 2019.

Borgaralegum vígslum fjölgað talsvert

Borgaralegum vígslum hefur fjölgað mikið frá síðustu aldamótum og voru ríflega þriðjungur, 37%af öllum hjónavígslum árið 2020 þegar þær voru 677 talsins samanborið við 259, 14,6% árið 2000. 

Þá kemur einnig fram í tilkynningu Hagstofu að aldur við hjúskap hefur hækkað en tíðasti aldur, meðalaldur og miðaldur við hjúskap hefur hækkað bæði hjá konum og körlum en árið 2001 var tíðasti aldur brúðguma 27 ára og brúða 28 ára.

Árið 2020 var meðalaldur brúðguma 32 ára og brúða 30 ár. Meðalaldur karla við upphaf hjúskapar er venjulega um tveimur árum hærri en kvenna.

Fjöldi lögskilnaða svipaður

Í tilkynningunni segir að þó svo að fjöldi lögskilnaða hafi hækkað úr 545 árið 2000 í 687 árið 2020 er fjöldi þeirra stöðugur yfir tímabilið ef litið er á lögskilnaði á hverja 1.000 íbúa. Árið 2020 voru 1,9 lögskilnaðir á hverja 1.000 íbúa en 1,8 árið 2010.

Á síðustu fimm árum hafa flestir þeirra sem skilja verið á aldrinum 35-39 ára eða 40-44.

• Blogga um frétt