Willum Þór Þórsson heilbrigðisráðherra ætlar að veita Landspítalanum 60 milljónir króna til þess að gera spítalanum kleift að úthýsa hundruð aðgerða og þar með stytta biðlista sem hafa myndast síðan í byrjun faraldursins.
Aðgerðirnar verða tiltölulega einfaldar og því ekki líklegt að í kjölfarið þurfi sjúklingar að leggjast inn á spítalann.
„Þetta er mikilvægt verkefni í þágu sjúklinga sem annars þurfa að bíða óhóflega lengi eftir aðgerð sem er íþyngjandi og slæmt fyrir heilsu fólks. Ég bind vonir við að hægt verði að ráðast í fleiri og stærri verkefni með þetta að markmiði á næstu mánuðum“ segir Willum Þór í tilkynningu frá heilbrigðisráðuneytinu.
Í haust var ráðist í sambærilegt átak þar sem heilbrigðisráðuneytið veitti spítalanum 26 milljónir króna í sama tilgangi.