Mega gefa vatn en ekki selja kók og sælgæti

Magnús Geir Þórðarson þjóðleikhússtjóri og Brynhildur Guðjónsdóttir, leikhússtjóri Borgarleikhússins.
Magnús Geir Þórðarson þjóðleikhússtjóri og Brynhildur Guðjónsdóttir, leikhússtjóri Borgarleikhússins.

Miðað við núgildandi reglugerð og þá óbreyttu reglugerð sem tekur á miðnætti er leikhúsum óheimilt að selja veitingar í hléi. Þrátt fyrir það er ekkert sem bannar að afhenda vatnsglös algjörlega frítt í hléi.

Leikhússtjórum stóru leikhúsanna tveggja finnst þetta skjóta skökku við og vonast til þess að þetta ákvæði verði fellt úr gildi þegar ný reglugerð rennur sitt skeið eftir tvær vikur í mesta lagi.

Það þykir mörgum vafalaust skiljanlegt, þar sem lítill munur er á því að afgreiða vatnsglös fríkeypis eða Síríuslengju og kók í gleri og taka fyrir það gjald.

„Ekki eitt einasta smit“

„Þrátt fyrir að við höfum sýnt fullan skilning á því að grípa hefur þurft til ýmissa aðgerða síðastliðna tuttugu mánuði, þá höfum við bent á það að undanförnu að menningarhúsin og leikhúsin eru sennilega öruggasti staðurinn til að vera á, það hefur ekki orðið eitt einasta smit meðal áhorfenda í öllum þessum húsum,“ segir Magnús Geir Þórðarson, Þjóðleikhússtjóri, í samtali við mbl.is.

„Og í dag er það þannig að fólk þarf að koma með hraðpróf, en það þarf samt að sitja með grímu og má ekki kaupa sér Opal-pakka í hléi eða gosflösku. Þar fyrir utan sitja allir í númeruðum sætum sem auðveldar smitrakningu ef á þarf að halda.“

Hann ítrekar að Þjóðleikhúsið og menningarstofnanirnar allar hafi unnið í nánu samstarfi við sóttvarnayfirvöld í baráttunni við faraldurinn.

Þjóðleikhúsið þegar allt mátti.
Þjóðleikhúsið þegar allt mátti. Ljósmynd/Ernir Eyjólfsson

Grímuskylda og hraðpróf íþyngjandi

Miðasala í leikhúsum var nokkuð góð í september og október en þegar tilkynnt var að framvísa þyrfti hraðprófi við komuna þangað hefur miðasala dregist snarpt saman.

Í ljósi þess hve aðstæður eru góðar í leikhúsum til þess að viðhafa fullnægjandi sóttvarnir, segir Þjóðleikhússtjóri að hann óski þess að sóttvarnayfirvöld felli á brott ýmsar ráðstafanir þar.

Í því sambandi segist hann heldur kjósa að fólk framvísi bólusetningavottorði við komuna í leikhúsið frekar en neikvæðu hraðprófi. Þá vill hann að grímuskylda verði dregin til baka á meðan sýningum stendur og loks að heimilt verði að selja veitingar í hléi.

„Fyrst og fremst snýst þetta bara um gestina okkar og upplifun þeirra. Það er kannski erfitt að sitja á leiksýningu með grímu en alveg hægt að komast í gegnum það. En það er leiðinlegt, sérstaklega á lengri sýningum, að geta ekki boðið gestum að kaupa sér hressingu í hléi,“ segir Magnús.  

Borgarleikhúsið tekur í sama streng

Undir þessi orð tekur Brynhildur Guðjónsdóttir, leikhússtjóri Borgarleikhússins, en áréttar þó að leikhúsið standi þétt við bakið á sóttvarnayfirvöldum þegar kemur að baráttunni við faraldurinn.

„Við erum að nálgast núna tuttugu mánuði í þessum faraldri og við sýnum fullan skilning á því sem verið er að gera og ég hef fulla trú á því að þetta komi með næstu reglugerð.

Fólk verður að geta staðið upp og teygt úr sér í hléi og það er auðvitað hluti af upplifun gesta að geta fengið sér kaffi og sörur í hléi eða fyrir börn að fá gosflösku og sælgæti.

Hins vegar getum við ekki meinað fólki að fá vatnsglas og þannig útfærum við það, en við höfum fulla trú á því að þetta komi bara með næstu reglugerð.“

mbl.is

Bloggað um fréttina