Mikil þörf á erlendu vinnuafli

Mikil þörf verður á fleiri aðfluttum einstaklingum til að manna þau störf sem verða til á komandi árum vegna lítillar fjölgunar innlends starfsfólks gangi hagvaxtarspár eftir. Má þá gera ráð fyrir að störfum muni fjölga um 15 þúsund á næstu fjórum árum en íbúum landsins á vinnualdri fjölgi á sama tíma um aðeins þrjú þúsund.

Þurfa tólf þúsund erlendir starfsmenn að flytjast til landsins til að sinna þeim störfum sem verða til fram á árið 2025. Þetta kemur fram í grein eftir Hannes G. Sigurðsson, ráðgjafa stjórnar og framkvæmdastjórnar Samtaka atvinnulífsins, um framboð og eftirspurn innlends og erlends starfsfólks á næstu árum.

Minnkandi fjölgun íbúa á vinnualdri hefur stuðlað að gífurlegri fjölgun erlendra starfsmanna. Samkvæmt mannfjöldaspá Hagstofunnar verður fjölgunin enn meiri.

„Miðað við 80% atvinnuþátttöku fjölgar innlendu starfsfólki aðeins um þrjú þúsund en erlendu starfsfólki um 21 þúsund. Hlutfall erlendra starfsmanna af starfandi á vinnumarkaði hækkar úr 21% í 27% á þessum fjórum árum.“