Málið hafi verið „algjör martröð“

Claudia Ashanie Wilson, lögmaður og móðir sextán ára pilts, sem lögregla og sérsveit höfðu afskipti af í tvígang í tengslum við leit að strokufanga í síðustu viku, segist miður sín yfir að saklaust barn  hafi verið dregið inn í hættulegar aðstæður, eingöngu vegna húðlitar.

Í samtali við RÚV segist Claudia vona að lögreglan og samfélagið allt eigi eftir að draga lærdóm af málinu.

Lög­regla hafði í tvígang af­skipti af syni Claudiu við leit að strokufang­an­um Gabrí­el Doua­ne Boama. Af­skipti voru höfð af pilt­in­um, sem er dökk­ur á hör­und eins og Gabrí­el, í kjöl­far ábend­inga. Hann teng­ist mál­inu hins veg­ar ekki neitt. Sérsveit ríkislögreglustjóra hafði fyrst afskipti af honum í strætisvagni og aðeins degi síðar höfðu lögregluþjónar síðan í annað sinn afskipti af honum í bakaríi þar sem hann var staddur með móður sinni. 

„Í stuttu máli var þetta algjör martröð. Saklaust barnið mitt var dregið inn í mjög hættulegar og ógnandi aðstæður, einkum vegna húðlitar. Ég hef kannski sagt þetta áður að það eru þrjú orð sem svört móðir vill aldrei heyra í sömu setningu og það er lögregla, byssur og barnið þitt,“ sagði móðir drengsins í kvöldfréttum.

mbl.is