Fjárveitingar miðaðar við félagslega stöðu hverfanna

Með nýju rekstrarlíkani fyrir grunnskóla Reykjavíkurborgar, sem gengur undir heitinu Edda, er tekið mið af félagslegri stöðu hverfa borgarinnar þegar skólunum er veitt fjármagn.

„Þeir skólar sem eru í félagslega viðkvæmum hverfum fá hlutfallslega meira fjármagn en skólar sem eru í félagslega sterkum hverfum af því að allar rannsóknir sýna að félagslegur bakgrunnur í nemendahópnum skiptir miklu máli upp á nám og námsárangur,“ segir Helgi Grímsson, sviðsstjóri skóla- og frístundasviðs Reykjavíkurborgar.

Meta félagslegan bakgrunn

„Aðstæður barna í skólahverfum eru ólíkar og það er mikilvægt að skólarnir hafi svigrúm til þess að mæta þörfum nemendahópsins. Grundvallarforsendan er að við metum hvað það er í félagslegum bakgrunni barns sem skýrir árangur á samræmdum prófum. Við erum ekki að skoða sjálf samræmdu prófin heldur að finna hvað býr þarna að baki.“