Fjölbreyttar sumarhátíðir fyrirhugaðar

Margir Íslendingar reyna nú að ákveða hvernig best er að nýta sumarfríið innanlands enda ljóst að úr miklu er að velja þegar hátíðir og dagskrár eru annars vegar. Stefnir allt í að í sumar verði ýmsar tónlistar- og bæjarhátíðir haldnar sem fólk hefur ekki haft færi á að njóta síðustu tvö sumur vegna kórónuveirufaraldursins.

Júnímánuður byrjar vel en þar kemur fyrst Color Run í Reykjavík 4. júní. Þar gefst gestum tækifæri á að hlaupa í gegnum fimm kílómetra litapúðurssprengju. Þeir sem vilja ekki hlaupa geta skellt sér á Bjórhátíðina á Hólum sömu helgi. Þar verða kynntar nýjar vörur frá bjórframleiðendum.

Þriðju helgina í júní er komið að þjóðhátíðardegi Íslendinga, 17. júní. Þá verða hátíðahöld í flestöllum bæjum landsins. Einnig er hægt að bruna norður á Bíladaga á Akureyri en þar er keppt í kappakstri og alls konar bílar verða til sýnis. Ef fólk vill vera nær höfuðborgarsvæðinu þá er Víkingahátíð í Hafnarfirði þar sem eru bardagasýningar, markaður og víkingaskóli barna. Síðustu helgina í júní geta landsmenn gætt sér á ljúffengum humri á Humarhátíðinni á Höfn í Hornafirði.

Júlímánuður gengur í garð með miklu fjöri en fyrstu helgina er Írskum dögum fagnað á Akranesi. Meðan á þeim stendur fer fram á Akranesi á kvöldin tónlistarhátíðin Lopapeysan þar sem verður brekkusöngur með tilheyrandi látum. Sömu helgi er Goslokahátíðin í Vestmannaeyjum þar sem lokum eldgossins á Heimaey árið 1973 er fagnað.

Helgina eftir það er hægt að velja á milli tónlistarhátíðarinnar Eistnaflugs í Neskaupstað og Kótilettunnar á Selfossi. Á Kótilettunni kynna bændur framleiðslu sína og síðar um kvöldið stíga margir af þekktustu tónlistarmönnum landsins á svið.

Þriðju helgina í júlí skemmta listamenn sér á Lunga á Seyðisfirði en þar eru listasmiðjur og sýningar. Hátíðinni er lokað með tónleikum um kvöldið. Ef höfuðborgarbúar vilja ekki leggja leið sína svo langt þá er á sama tíma bæjarhátíðin Blóm í bæ í Hveragerði.

Helgina fyrir verslunarmannahelgina er einnig úr nægu að velja en þá eru Mærudagar á Húsavík með tónleikum og ýmsum viðburðum fyrir alla fjölskylduna og Bræðslan á Borgarfirði eystri þar sem er ball laugardagskvöldið.

Úr mörgu að velja um verslunarmannahelgi

Um verslunarmannahelgina, frá 29. júlí til 1. ágúst, er úr nægu að velja. Þjóðhátíð í Vestmannaeyjum verður haldin en henni var aflýst síðustu tvö ár. Fyrir þá sem eru minna fyrir útilegur er Innipúkinn í Reykjavík en þar mun margt tónlistarfólk stíga á pall. Síðan má ekki gleyma bæjarhátíðinni á Flúðum yfir verslunarmannahelgina þar sem verður brenna, brekkusöngur og fleira. Fyrir þá sem vilja frekar nýta helgina í íþróttir er mýrarbolti í Bolungarvík eða bæjarhátíðin Ein með öllu á Akureyri þar sem m.a. verður keppt í alls kyns jaðaríþróttum.

Fjörið í sumar hættir ekki með verslunarmannahelginni en eftir hana er til dæmis Gleðigangan í Reykjavík, hápunktur Hinsegin daga sem eru haldnir frá 2. til 7. ágúst. Að lokum má segja að sumrinu ljúki með Menningarnótt í Reykjavík 20. ágúst með tónleikum og flugeldasýningu.

• Blogga um frétt