Töluvert slasaður eftir um 30 metra fall

Þyrla Landhelgisgæslunnar flutti manninn til Reykjavíkur.
Þyrla Landhelgisgæslunnar flutti manninn til Reykjavíkur. mbl.is/Sigurður Bogi

Maður féll um 20 til 30 metra niður gil í Norðdal við þjóðveginn upp á Steingrímsfjarðarheiði á Ströndum fyrr í dag.

Úlfar Örn Hjartarson, svæðisstjóri björgunarsveitarinnar Dagrenningar á Ströndum, staðfestir þetta í samtali við mbl.is. Maðurinn er töluvert slasaður, að sögn Úlfars.

„Okkar menn komu á staðinn og vegfarandi var búinn að hlúa að honum, og okkar menn ásamt sjúkraflutningamönnum fóru ásamt lækni og hlúðu enn frekar að honum þangað til þyrla Landhelgisgæslunnar kom á vettvang.“

Óskað var eftir aðstoð björgunarsveitarinnar um klukkan tíu mínútur í tvö en þyrlan lenti með manninn á Landspítalanum í Fossvogi rétt fyrir klukkan fimm.

Úlfar segir að björgunaraðgerðir hafi heilt yfir gengið mjög vel og voru um það bil 20 manns á vettvangi þegar mest lét.

Um það bil 20 manns voru á vettvangi þegar mest …
Um það bil 20 manns voru á vettvangi þegar mest lét. Ljósmynd/Björgunarsveitin Dagrenning
mbl.is