Þrír handteknir grunaðir um ólöglega dvöl

Þrír erlendir einstaklingar voru handteknir og vistaðir í fangaklefa í nótt þar sem grunur er um að þeir hafi dvalið of lengi í landinu og þar með í ólöglegri dvöl.

Þetta kemur fram í dagbók lögreglu en þar segir að mál þeirra verði rannsökuð nánar í dag.

Þá var tilkynnt um eld í skúr í Garðabæ í gær en ekki er vitað hvert tjónið er. Auk þess var tilkynnt um eld í rusli við leikskóla í Grafarvogi og segir í dagbókinni að nokkurt tjón sé á húsnæði leikskólans eftir eldinn.

Lögregla hafði afskipti af tveimur einstaklingum í miðbænum í nótt en þeir eru grunaðir um vörslu fíkniefna. Þá var auk þess nokkuð um að bifreiðar væru stöðvaðar þar sem ökumenn voru grunaðir um akstur undir áhrifum fíkniefna eða áfengis.

• Blogga um frétt