Innlent | mbl | 17.12.2022 | 13:14 | Uppfært 14:37

Heimsending matar fellur niður en neyðarskýli opna

Ragnar Erling Hermannsson, heimilislaus maður, birti á Facebook síðu sinni myndband þar sem hann gagnrýndi borgina fyrir að hafa lokað gistiskýlunum í morgun. Þau hafa verið opnuð á ný og verða öll opin allan sólarhringinn í dag og á morgun. Skjáskot af myndbandi

Heimsending matar á vegum Velferðarsviðs Reykjavíkur fellur niður í dag, vegna veðurs. Hefst hún aftur á morgun, um leið og færð leyfir. Þetta kemur fram í tilkynningu frá Reykjavíkurborg.

Neyðarskýlin þrjú í Reykjavík eru öll opin í dag. Þá hefur neyðaráætlun í málflokki heimilislausra, með miklar og flóknar þjónustuþarfir, verið virkjuð vegna veðurs.

Gistiskýlin verða opin alla helgina

Ragnar Erling Hermannsson, heimilislaus maður, birti á Facebook síðu sinni myndband þar sem hann gagnrýndi borgina fyrir að ætla að loka gistiskýlunum í morgun. Nú liggur fyrir að þau verði öll opin allan sólarhringinn í dag og á morgun.

Soffía Hjördís Ólafsdóttir, félagsráðgjafi og teymisstjóri í málaflokki heimilislausra segir að neyðaráætlun í málaflokki heimilislausra taki við af litakóðuðum viðvörunum veðurstofunnar, og því hvort aukin hætta sé á að þjónustuþegar verði fyrir ofkólnun vegna kulda og snjóþunga.

Það var mat teymisins í morgun og því tekin ákvörðun um að virkja neyðaráætlunina og tryggja mönnun til þess að opna skýlin.

Hér fyrir neðan má sjá myndbandið sem Ragnar birti.