Loka þurfti Suðurlandsvegi til vesturs í um 80 mínútur í kjölfar þess að vörubíll fór út af veginum nærri Kömbum fyrir ofan Hveragerði.
Lokunin kom til að beiðni lögreglunnar.
Í færslu frá Vegagerðinni á Twitter frá því um klukkan hálf tvö í dag segir að heiðin hafi eingöngu verið lokuð til vesturs.
Þá kemur fram í samtali mbl.is við Vegagerðina að búið sé að opna veginn. Alls hafi Suðurlandsvegi verið lokað í 80 mínútur vegna atviksins. Hjáleið var um Þrengsli á meðan aðgerðir stóðu yfir.
Greiðlega gekk að ná ökutækinu upp á veg en ekki liggja fyrir upplýsingar um skemmdir á því eða slys á fólki.