Aukið samstarf vegna barna í viðkvæmri stöðu

Reykjavíkurborg, lögreglustjórinn á höfuðborgarsvæðinu, sýslumaðurinn á höfuðborgarsvæðinu, Heilsugæsla höfuðborgarsvæðisins og Fjölbrautaskólinn í Breiðholti hafa mótað sameiginlegt verklag til að draga úr líkum á auknu og alvarlegu ofbeldi meðal barna og stuðla að farsæld fyrir börn í viðkvæmri stöðu.

Samstarfsyfirlýsing þess efnis var undirrituð í dag. 

Verður unnið sameiginlega að innleiðingu þess á starfssvæði Suðurmiðstöðvar Reykjavíkurborgar og mun reynslan af innleiðingunni verða nýtt til að þróa samstarf í öðrum borgarhlutum í kjölfarið.

Í tilkynningu segir að sameiginlegt verklag muni meðal annars fela í sér:

• bætta eftirfylgni skóla, félagsþjónustu, barnaverndar og lögreglu vegna barna í kjölfar tilkynninga um heimilisofbeldi til lögreglu, 
• fastan tengilið barnaverndar við Suðurmiðstöð, 
• reglulega tilkynningafundi lögreglu og barnaverndar, 
• auk þess sem unnið er að innleiðingu farsældarlaganna með ráðningu málastjóra og tilnefningu tengiliða hjá lykilstofnunum.  

Verkefnið var styrkt af bæði félags- og barnamálaráðherra og dómsmálaráðherra.   

Börn í viðkvæmri stöðu eru börn yngri en 18 ára sem eru þolendur og gerendur í ofbeldismálum og falla undir tilkynningarskyldu almennings samkvæmt ákvæðum  barnaverndarlaga um að:

• a) búa við óviðunandi uppeldisaðstæður,
• b) verða fyrir ofbeldi eða annarri vanvirðandi háttsemi eða
• c) stofna heilsu sinni og þroska í alvarlega hættu. 

• Blogga um frétt