Maðurinn sem fannst látinn í fjörunni við Straumseyri rétt við Borgarnes þann 13. apríl var Modestas Antanavicius, 46 ára karlmaður, sem hvarf 7. janúar.
Þetta staðfestir lögreglan á Vesturlandi í tilkynningu á Facebook-síðu sinni.
Umfangsmikil leit hófst eftir að Modestas hvarf í janúar án árangurs. Í tilkynningu lögreglu kemur fram að ekki sé talið að lát Modestas hafi borið að með saknæmum hætti.
„Lögreglan á Vesturlandi naut aðstoðar kennslanefndar ríkislögreglustjóra, tæknideildar lögreglustjórans á höfuðborgarsvæðinu og réttarmeinadeildar við rannsókn málsins,“ segir í tilkynningunni.