Innlent | mbl | 23.11.2023 | 19:05

Grindvíkingar fá enn rýmri heimild

Eggert Johannesson

Á morgun mega Grindvíkingar fara inn í bæinn á stærri bifreiðum sem eru allt að 3,5 tonn í heildarþyngd. Einnig verða kerrur leyfðar í íbúðahverfum, en það mátti ekki í dag.

Þetta kemur fram í tilkynningu frá almannavörnum nú rétt fyrir klukkan 19.

Nýtt fyrirkomulag var tekið upp í dag þar sem Grindvíkingar fengu að sækja verðmæti og huga að eigum sínum frá kl. 11 til 16. Á morgun verður heimilt að fara inn í bæinn milli klukkan 9 og 16.

Frétt af mbl.is

„Maður getur ekki hugsað“

Í tilkynningunni segir að hættustig sé enn í gildi en að líkur á fyrirvaralausu eldgosi séu taldar minni en áður. Þá sé talið að svigrúm til að bregðast við eldgosi rýmri en áður.

Öryggi Grindvíkinga sé þó í fyrirrúmi og því gæti þurft að rýma bæinn með stuttum fyrirvara.

Upplýsingar fyrir Grindvíkinga sem vilja sækja verðmæti eða huga að eignum sínum:

Íbúar í Grindavík beðnir um að skrá sig á www.island.is og fá þar heimild til þess að fara inn. Heimildin mun berast fljótt.
Þeir íbúar sem nú þegar hafa fengið staðfesta skráningu á beiðni til að fara inn í húseign þurfa ekki að sækja um aftur.
Grindavík er lokuð fyrir öllum öðrum en íbúum bæjarins og þeim sem aðstoða íbúa.
Grindavíkurvegur er lokaður, en hægt er að aka Nesveg og Suðurstrandarveg.
Mælst er til þess að fólk komi á eigin bílum, hámark 1 bíll á hvert heimili. Ekki er æskilegt að börn séu tekin með sökum aðstæðna á staðnum.
Áfram eru gámabílar, gámar eða gámaflutningatæki, stórir sendibílar (yfir 3.5 tonn), ekki leyfðir.
Hvorki er virkt frárennsli né rennandi vatn þannig að ekki hægt að nota salerni í húsum í Grindavík. Salerni eru í bænum við grunnskólana tvo.
Mælt er með að fólk komi með vatn og önnur matföng fyrir daginn því ekki er hægt að nálgast slíkt í bænum.
Hafa ber í huga að hús gætu verið ótrygg. Hægt er að hafa samband við viðbragðsaðila á staðnum.
Þeim íbúum í skemmdum húsum sem þegar hafa fengið leyfi er heimilt að flytja búslóðir sínar burt.
Mikilvægt er að hvert og eitt heimili skrái hjá sér þau verðmæti sem tekin eru úr húsunum og hafi samband við sitt tryggingafélags vegna þess.
Eigendur húsa eru hvattir til þess að koma kyndingu í lag en von er á kólnandi veðri á næstunni.
Iðnaðarmenn og íbúar verða að störfum í húsum þar sem hitaveita er ekki í lagi.
Íbúar eru hvattir til þess að ganga um og frá húsum sínum með þeim hætti að komið geti til rýminga með stuttum fyrirvara.
Mikilvægt er að þau sem fara til Grindavíkur fylgi tilmælum viðbragðsaðila á öllum stundum.
Athygli er vakin á að á sama tíma og íbúar fá aðgang er unnið að öðrum verkefnum í bænum.
Fjölmiðlum er heimilaður aðgangur.
Komi til rýmingar vegna hættuástands munu viðbragðsaðilar þeyta sírenum og ljósmerkjum á ökutækjum og þýðir það tafarlaus rýming á svæðinu samkvæmt rýmingaráætlun. Rýmingarleiðir út bænum eru eftir Suðurstrandavegi eða Nesvegi.