Sævar Baldursson, íbúi í Ytri-Njarðvík í Reykjanesbæ, segir í samtali við mbl.is að sjónarspil eldgossins sé ótrúlegt. Að hann best getur séð hefur sprungan verið að lengjast í báðar áttir frá því að gosið hófst.
„Ég var bara í sturtu þegar konan kallaði á mig að þetta væri byrjað,“ segir Sævar og bætir því að gosið hafi farið af stað með miklum krafti.
Hann hefur tekið ótrúlegar myndir og myndbönd frá Ytri-Njarðvík sem sýna gosið.
Sævar kveðst ekki finna fyrir loftmengun en ekki er mikill vindur úti og vindáttin virðist vera frá Reykjanesbæ.