Hæstiréttur hefur hafnað beiðni Einars Ágústssonar, sem hvað þekktastur er fyrir að vera annar bróðirinn á bak við trúfélagið Zuism, um áfrýjunarleyfi. Mun því dómur Landsréttar yfir Einari standa, en hann var í október í fyrra dæmdur í þriggja ára fangelsi fyrir fjársvik með því að hafa haft tugi milljóna af þremur einstaklingum og félögum. Sagðist Einar ætla að stunda fjárfestingar, en peningana nýtti hann hins vegar í eigin þágu.
Einar sótti um áfrýjunarleyfið, en ákæruvaldið lagðist gegn beiðninni. Taldi Einar að málið hefði verulega almenna þýðingu og að mikilvægt væri að fá úrlausn um það fyrir Hæstarétti. Þá væri ástæða til að ætla að málsmeðferð Landsréttar væri stórlega ábótavant og dómurinn bersýnilega rangur. Einnig er vísað til mikils dráttar á málsmeðferð, en brotin voru framin á árunum 2010 til 2012. Einnig telji Einar að endurskoða eigi sakfellingu út frá ákvæðum þágildandi laga um gjaldeyrismál.
Upphaflega var Einar dæmdur í þriggja ára og níu mánaða fangelsi í Héraðsdómi Reykjaness í júní 2017. Hann áfrýjaði málinu til Landsréttar sem stytti dóminn í þrjú ár. Einar fór síðar fram á endurupptöku málsins sem Endurupptökudómur samþykkti og fór málið því aftur fyrir Landsrétt.
Var endurupptakan samþykkt þar sem einn dómari í málinu fyrir Landsrétti hafði verið á meðal þeirra sem Sigríður Á. Andersen, þáverandi dómsmálaráðherra, skipaði og voru undir í Landsréttarmálinu svokallaða.
Landsréttur komst í dag hins vegar að sömu niðurstöðu og áður, það er að dæma Einar í þriggja ára fangelsi.
Einari er jafnframt gert að greiða tveimur aðilum sem hann hafði haft fé af samtals tæplega 71 milljón auk vaxta.
Í héraðsdómi hafði þrotabúi félagsins Skajaquoda ehf., sem Einar stýrði áður, verið gert að sæta upptöku á 74 milljónum króna sem voru á reikningum þess. Átti þessi upphæð að fara til greiðslu á einkaréttarkröfum þeirra sem Einar hafði haft fé af. Þrotabúið ákvað að áfrýja ekki þessum hluta málsins og stóð hann því áfram.
Þetta er ekki eina dómsmálið sem Einar hefur verið ákærður í á síðustu árum. Hann og bróðir hans, Ágúst Arnar Ágústsson, voru báðir ákærðir í tengslum við rekstur trúfélagsins Zuism. Þeir voru báðir sýknaðir af ákæru um fjársvik og peningaþvætti í Héraðsdómi Reykjavíkur í fyrra, en Ríkissaksóknari áfrýjaði málinu til Landsréttar, en málið hefur verið sett á dagskrá Landsréttar 29. febrúar.
Bræðurnir tveir voru ákærðir fyrir að látast reka trúfélag sem uppfyllti skilyrði laga um slík félög og svíkja þannig ríflega 85 milljónir króna út úr ríkinu í formi sóknargjalda. Sömuleiðis voru þeir ákærðir fyrir peningaþvætti á fjármununum.