Þrýstingsbreytingar í borholukerfum HS Orku benda til þess að kvikuhlaup sé hafið. Skjálftavirkni er nú mest suðaustan Sýlingarfells en virknin gæti færst.
„Það [eldgos] er mjög líklegt á næstu mínútum eða klukkutímum. Það er alla vegana kvika á ferðinni,“ segir Benedikt Gunnar Ófeigsson, fagstjóri aflögunarmælinga á Veðurstofu Íslands, í samtali við mbl.is.
Jarðskjálftavirkni jókst skyndilega við Sundhnúkagíga upp úr kl. 16 í dag. Stærsti skjálfti sem hefur mælst þar á síðustu klukkustundum er 2,4 að stærð.
Jarðskjálftahrinan heldur áfram en upp úr kl. 16.30 sáust þrýstingsbreytingar í borholum HS Orku í Svartsengi, að sögn Benedikts. Breytingarnar séu merki um að kvika sé „á ferðinni“.
Rýming hefur verið boðuð umhverfis Grindavík og Bláa lóninu.
„Við erum ekki að sjá mikla aflögun enn þá en það eru skýr merki um að kvikuinnskot sé í gangi,“ segir hann.
Mesta skjálftavirknin eru suðaustan við Sýlingarfell og eldgos því líklegast þar eins og staðan er núna.
„En hún [virknin] getur færst til. Þetta eru merki um að kvika sé að reyna að troða sér eitthvert og við vitum ekkert hversu langt hún fer áður en hún kemst upp á yfirborðið, eða yfir höfuð kemst upp.“