Sigurður Jökull Ólafsson var í flugi Icelandair frá Kaupmannahöfn þegar eldgos hófst a Reykjanesskaga. Flugstjórinn tilkynnti farþegum vélarinnar að byrjað væri að gjósa og fengu þeir gott útsýni yfir gosið áður en flugvélin lenti. Hann segir magnað að hafa séð gosið úr háloftunum.
Sigurður var á leiðinni heim eftir langt ferðalag frá Genóa með millistoppi í Mílanó og Kaupmannahöfn.
„Maður vissi ekkert af þessu. Svo þegar við erum að fara að lenda segir flugstjórinn að það sé byrjað að gjósa og að við munum fljúga yfir,“ segir Sigurður og bætir við að þrátt fyrir að það hafi verið aðeins skýjað hafi gosið sést ansi vel.
Þegar flugvélin nálgaðist Keflavíkurflugvöll segir Sigurður svo mikinn bjarma hafa verið yfir að það var eins og að fljúga inn í stórborg.
„Útsýnið yfir gosið var mín megin og öll flugvélin teygði sig eins og hún gat yfir til að sjá þetta.“
Þá segir Sigurður útsýnið hafa verið magnað.
„Ég get ekki sagt annað en eftir vel yfir heilan dag í löngu ferðalagi er þetta magnaðasta heimkoma sem ég hef, og mun líklegast upplifa.“
Flestir farþegarnir í vélinni voru útlendingar segir Sigurður og er ansi viss um að þetta hafi ekki verið upplifun sem þau bjuggust við.
„Allir átta sig á því að þetta er ógnvekjandi vegna þess hve nálægt byggð þetta er en stórfenglegt er þetta engu að síður.“