Helga Sigrún Harðardóttir í 3. sæti hjá Framsóknarflokknum

Helga Sigrún Harðardóttir.
Helga Sigrún Harðardóttir. mynd/sudurland.is

Helga Sigrún Harðardóttir, skrifstofustjóri í Reykjanesbæ, er í 3. sæti á framboðslista Framsóknarflokksins í Suðurkjördæmi. Þetta var ákveðið á kjördæmisþingi Framsóknarflokksins í Suðurkjördæmi sem haldið var í dag á Hótel Selfossi. Helga Sigrún, sem er skrifstofustjóri þingflokks Framsóknarflokksins, tók ekki þátt í prófkjöri flokksins um síðustu helgi en Hjálmar Árnason, alþingismaður, sem lenti í þriðja sæti, þáði ekki sætið.

Á þinginu komu fram tvær tillögur, að því er kemur fram á fréttavefnum Suðurlandi.is. Annarsvegar um að Helga Sigrún skipaði sæti Hjálmars og hinsvegar um að Eygló Harðardóttir sem lenti í fjórða sæti yrði færð upp. Kosið var milli þessara tveggja tillagna og var naumur meirihluti fyrir því að Helga Sigrún hlyti sæti Hjálmars.

Framboðslistinn er eftirfarandi:

  1. Guðni Ágústsson, landbúnaðarráðherra, 57 ára, Árborg
  2. Bjarni Harðarson, bóksali, 45 ára, Árborg
  3. Helga Sigrún Harðardóttir, skrifstofustjóri, 37 ára, Reykjanesbæ
  4. Eygló Harðardóttir, framkvæmdastjóri, 34 ára, Vestmannaeyjum
  5. Elsa Ingjaldsdóttir, framkvæmdastjóri, 40 ára, Árborg
  6. Lilja Hrund Harðardóttir, búfræðingur, 34 ára, Hornafirði
  7. Brynja Lind Sævarsdóttir, flugöryggismaður, 31 árs, Reykjanesbæ
  8. Kjartan Lárusson, sauðfjárbóndi og nemi, 51 árs, Bláskógabyggð
  9. Gissur Jónsson, grunnskólakennari, 30 ára, Árborg
  10. Bryndís Gunnlaugsdóttir, laganemi, 26 ára, Grindavík
  11. Ólafur Elvar Júlíusson, byggingatæknifræðingur, 48 ára, Rangárþingi ytra
  12. Agnes Ásta Woodhead, þjónustufulltrúi, 32 ára, Garði
  13. Guðni Sighvatsson, nemi í íþróttafræðum, 26 ára, Rangárþingi ytra
  14. Agnes Lára Magnúsdóttir, söluráðgjafi, 40 ára, Reykjanesbæ
  15. Lára Skæringsdóttir, hárgreiðslumeistari, 37 ára, Vestmannaeyjum
  16. Ásta Berghildur Ólafsdóttir, framkvæmdastjóri, 43 ára, Ásahrepp
  17. Anna Björg Níelsdóttir, skrifstofumaður, 38 ára, Ölfusi
  18. Auður Jóna Sigurðardóttir, bóndi, 48 ára, Rangárþingi Eystra
  19. Elín Einarsdóttir, kennari/sveitarstjórnarmaður, 40 ára, Mýrdalshreppi
  20. Hjálmar Árnason, alþingismaður, 56 ára, Reykjanesbæ.
mbl.is

Bloggað um fréttina