Málefnasamningur Sjálfstæðisflokks og Vinstrihreyfingarinnar – græns framboðs í Mosfellsbæ hefur verið undirritaður. Haraldur Sverrisson, bæjarstjóri Mosfellsbæjar og oddviti Sjálfstæðisflokksins, og Bjarki Bjarnason, oddviti Vinstri grænna, undirrituðu samninginn við Hlégarð á þriðjudag.
D- og V-listi fengu fimm af níu bæjarfulltrúum kjörna í nýliðnum sveitarstjórnarkosningum og halda meirihlutasamstarfi sínu áfram sem hófst árið 2006.
Haraldur er ánægður með niðurstöðuna og samstarfið við Vinstri græna. „Með okkar góðu gildi að leiðarljósi, virðingu – jákvæðni – framsækni og umhyggju eru okkur allir vegir færir. D- og V- listi hafa verið við stjórnvölinn undanfarin 12 ár og á þeim tíma hefur samfélagið eflst og þjónustan tekið stakkaskiptum. Við ætlum að halda áfram á sömu braut, gera enn betur og sjá til þess að áfram sé best að búa í Mosfellsbæ,“ er haft eftir bæjarstjóranum í tilkynningu.
Skólamál, íþróttamannvirki, velferðarmál og umhverfismál eru meðal þess sem finna má í málefnasamningnum. „Í samningnum er talað skýrt í öllum málaflokkum sem snerta alla bæjarbúa með einum eða öðrum hætti. Mosfellingum fjölgar ört um þessar mundir og við erum reiðubúin að takast á við verkefnin sem stækka með hverju árinu,“ er haft eftir Bjarka í tilkynningu.