Tugir ísbjarna gæddu sér á hvalshræi

Báti fullum af ferðamönnum var siglt framhjá rússneskri eyju í norðurhöfum í september og við blasti mjög svo óvenjuleg sjón: Tugir ísbjarna voru saman komnir að gæða sér á hvalshræi. Talið er að þeir hafi verið um 200 talsins.

Í fyrstu héldu ferðamennirnir að hvítu flekkirnir í hlíðunum væru ísjakar á þurru landi en svo áttuðu þeir sig á því að þetta voru ísbirnir í tuga tali.

„Þetta var algjörlega einstakt,“ segir Alexander Gruzdev, forstöðumaður náttúruverndarsvæðisins á Wrangel-eyju. „Við erum steinhissa ef satt skal segja.“

Hvítabirnirnir höfðu safnast saman til að éta hvalshræ sem rekið hafði í fjöruna. Í kjölfarið hvíldu þeir sig svo í nágrenninu. Í hópnum voru margar fjölskyldur ísbjarna, m.a. tvær birnur sem höfðu hvor fyrir sig fjóra húna með sér að sögn Gruzdevs.

Vegna loftslagsbreytinga bráðnar ísinn, sem er kjörlendi ísbjarna, fyrr á hverju ári. Það þýðir að birnirnir þurfa að dvelja lengur í landi og aðlagast lífinu þar.

Þetta er vissulega áhugaverð sjón fyrir ferðamenn en þegar svo margir ísbirnir eru saman komnir á litlu svæði er ljóst að baráttan um fæðuna verður harðari. Og dvelji birnir meira í landi en áður stafar íbúum í þorpum á eyjum og öðrum svæðum sem þeir komast ekki frá meiri hætta af þeim. 

Wrangel-eyja er undan ströndum norðausturhluta Rússlands. Þar hvíla ísbirnir sig gjarnan eftir að ísinn bráðnar á tímabilinu ágúst til nóvember. Eftir það geta þeir yfirleitt komist út á ísinn og hafið selveiðar sínar. 

„Hvalur er fágæt gjöf til þeirra,“ segir Gruzdev. „Fullorðinn hvalur getur verið tugir tonna á þyngd.“ Það þýðir að hræið getur reynst matarkista fyrir birnina vikum og jafnvel mánuðum saman.

Samkvæmt rannsóknum dvelja hvítabirnir nú um mánuði lengur ár hvert á Wrangel-eyju en þeir gerðu fyrir tuttugu árum. Skýringin er bráðnun íssins. Í ár er fjöldi þeirra á eyjunni einstaklega hár. Talin hafa verið 589 dýr en yfirleitt hafa þau verið um 2-300 síðustu ár.

Talið er að ísbjarnarstofninn á heimskautasvæðinu sé um 26 þúsund dýr. Óttast er að björnunum muni fækka vegna loftslagsbreytinga sem hafa gert lífsbaráttu þeirra mun harðari en áður. Ísbirnir þurfa að komast út á ísinn til að veiða. 

Eins og staðan er í dag telja vísindamenn að stofn hvítabjarna í hafinu norðaustur af Rússlandi sé nokkuð heilbrigður. En eftir því sem dvalartími þeirra í landi eykst með bráðnun íssins þeim mun meiri hætta steðjar að stofninum.

• 1 blogg um fréttina

Bloggað um fréttina

• Valdimar Samúelsson: Grænfriðungar og aðrir spámenn lugu að heiminum að Ísbjörninn væri …