Ísland framarlega í skipulagi bólusetninga

Bólusetningar í Laugardalshöll.
Bólusetningar í Laugardalshöll. mbl.is/Kristinn Magnússon

„Kerfið sem Origo hefur þróað heldur utan um alla þá einstaklinga sem þurfa á bólusetningu að halda og í kerfinu er hægt að skrá í þá forgangshópa sem hafa verið skilgreindir. Vegna þess að bóluefnin eru mismunandi hefur kerfið verið forritað á þann hátt að einstaklingar eru kallaðir inn á mismunandi vegu eftir hverju bóluefni.“

Þetta segir Arna Harðardóttir, viðskiptastjóri hjá Origo, en fyrirtækið hefur þróað kerfi sem heldur utan um bólusetningar gegn kórónuveirunni og stýrir einnig flæði einstaklinga á bólusetningarstað.

Í tilkynningu frá Origo er tekið fram að skráningin sé mjög einföld og byggi á því að einstaklingur fái sent strikamerki með SMS-skilaboðum.

Arna Harðardóttir, viðskiptastjóri hjá Origo.
Arna Harðardóttir, viðskiptastjóri hjá Origo.

„Þegar einstaklingur er bólusettur er strikamerkið skannað og fara þá sjálfkrafa upplýsingar um bólusetninguna inn í öll kerfi heilbrigðiskerfisins. Upplýsingarnar um bólusetninguna eru þá komnar inn í bólusetningargrunn sóttvarnalæknis, sjúkraskrá einstaklings og inn í Heilsuveru, sameiginlega heilbrigðisgátt Íslendinga,“ segir Arna.

„Þar birtist síðan bólusetningarvottorð einstaklings, en Ísland var fyrst þjóða til að gefa út rafrænt bólusetningarvottorð.“

Rafrænu innviðirnir skiptu máli

Arna segir að bólusetningarkerfið passi að flæði og skipulag á bólusetningarstað sé gott.

„Mikilvægt er að álagið sé jafnt og ekki of margir mæti á sama tíma. Ísland stendur mjög framarlega hvað varðar skipulag bólusetninga og utanumhald. Ísland er komið mjög langt í stafrænni þróun og sjálfvirknivæðingu heilbrigðiskerfisins. Íslenskt heilbrigðiskerfi er einstaklega öruggt og gagnsætt vegna mikilla samtenginga milli kerfa,“ segir hún og bætir við að heilbrigðislausnir Origo hafi verið leiðandi í þróun á þeim rafrænu innviðum og kerfum sem eru til staðar í íslensku heilbirgðiskerfi.

„Þessir rafrænu innviðir og kerfi gera það að verkum að hægt var að þróa bólusetningarkerfi hratt svo hægt væri að bólusetja Íslendinga á öruggan hátt.“

mbl.is