Það er heilmikil kúnst að dekka borð svo að sómi sé að og því fékk Matarvefurinn til liðs við sig smekkkonu mikla, Kolbrúnu Pálínu Helgadóttur ritstýru, sem snaraði fram veisluborði án þess að blása úr nös.
Hér er notast við skreytingar úr öllum áttum. Blóm eru mikilvæg og hér sjáum við einfalda en áhrifamikla útfærslu sem passar sérlega vel við litaþemað. Blómin eru frá blómaskreytinum Hrafnhildi Þorleifsdóttur sem rekur blómaverkstæðið Blómagallerí á Hagamel. Takið eftir því að litsterk blómin rífa upp dramatískan og dökkan borðbúnaðinn svo um munar. Dökkbleikt og svart á nefnilega svo ákaflega vel saman.
Stóri blómavasinn á borðinu er frá Ro og fæst í versluninni Andreu í Hafnarfirði sem og litli vasinn í sama stíl. Þeir fást einnig með gyllingu í stað bronsins.
Þegar borð er dekkað eftir kúnstarinnar reglum skal vanda til verka. Ekki þarf að fylgja reglunum til hins ýtrasta enda er það býsna flókið. Gott er þó að hafa hnífapörin alltaf bein, láta þau bera við borðbrún, setja rauðvínsglasið beint fyrir ofan hnífinn og raða hnífapörunum í stærðarröð sé um nokkur áhöld að ræða.
Annars er þetta ekki svo heilagt. Aðalatriðið er að borðið sé snyrtilegt og fallegt og ef ykkur finnst vanta skraut á borðið þá er einföld lausn í boði: Setjið fleiri kerti á boðið. Ekki vera heldur of stíliseruð heldur leyfið ykkur að vera villt og pínu galin og ekki gleyma að það þarf að vera pláss á borðinu fyrir matinn.