Matur | mbl | 3.1.2018 | 17:03

Laxapasta sem sameinar tvo heima

Hver elskar ekki gott pasta? mbl.is/GoodToKnow

Nú þegar flestir eru með hugann við hollara mataræði er ekki úr vegi að skella í smá laxapasta að hætti meistaranna. Laxapasta eða laxalinguine sameinar í raun tvo heima: hollustu og lúxus. Við getum fært sannfærandi rök fyrir því að það sé afar snjallt að byrja janúar á einmitt svona mat þannig að líkaminn fái notalega aðlögun að hollustufæðinu eftir dásamlegt desembersukkið.

Laxalinguini meistaranna

3 laxaflök
smjörklípa
80 g dill
50 g afhýddar möndlur
1 hvítlauksgeiri
4 msk. ólífuolía
rifinn börkur af 1 sítrónu
safi úr 1/2 sítrónu
300 g linguine
salt og pipar

Aðferð:

Kryddið laxinn og setjið í eldfast mót ásamt smjöri. Bakið í 12-15 mínútur við 180 gráðu hita (fer eftir þykkt flaksins). Takið út úr ofninum, fjarlægið roðið og rífið í sundur með gaffli.
Blandið saman dilli, möndlum, hvítlauk og ólíufolíu í matvinnsluvél og maukið vel saman. Bætið sítrónuberki og safa við og kryddið.
Sjóðið linguine samkvæmt leiðbeiningum, síið en geymið 2 msk. af soði. Setjið í skál og blandið maukinu ásamt soðinu saman við og hrærið. Setjið laxinn að síðustu saman við og blandið létt saman. Kryddið með salti og pipar eftir smekk.