Matur | mbl | 10.1.2018 | 14:20

Sælkerakjúklingur sem bræddi bragðlaukana

mbl.is/ÞS

Þessi kjúklingaréttur er merkilega auðveldur enda fylgdist ég vel með þegar hann var gerður. Það eina sem til þurfti var að setja tvo kjúklinga á ofnplötu, skera niður grænmeti, skella á ofnplötuna ásamt kryddi og dálítið vel af smjöri og voila! Hreinræktað kraftaverk.

Flóknari var máltíðin ekki þetta kvöldið enda algjör mánudagur í mönnum. Engu að síður rosalega góður réttur og ég held því fram að kryddblandan hafi tekið hann upp á næsta stig.

Undirbúningurinn tók um það bil átta mínútur og svo var bara að láta kjúkinginn eldast á 170 gráðum í 100-110 mínútur.

Mér fannst einstaklega snjallt að elda tvo kjúklinga í einu þar sem afgangurinn nýtist næstu daga. Það vill jafnframt svo skemmtilega til að verið er að passa mataræðið sérlega vel á heimilinu þessa dagana þannig að kjúklingurinn smellpassaði inn í það prógramm.

Sælkerakjúklingur sem bræddi bragðlaukana

1-2 kjúklingar
1 stór sætkartafla
1 rauðlaukur
2 sítrónur
4 stilkar rósmarín
smjör
kjúklingakrydd
salt og pipar

Aðferð:

Setjið kjúklinginn í ofnskúffu eða eldfast mót. Kryddið vel.
Skerið sætkartöflur í grófa bita og lauk í þunnar sneiðar. Saxið rósmarínið og sneiðið sítrónurnar.
Setjið kartöflur og lauk allt í kringum kjúklinginn og sáldrið rósmaríni yfir. Raðið sítrónum á kjúklinginn. Kryddið með salti og pipar. Setjið nokkrar vænar klípur af smjöri yfir grænmetið og inn í ofn á 170 gráður í 100-110 mínútur.