Matur | mbl | 11.3.2018 | 17:02 | Uppfært 21:22

Steikt bleikja með kryddjurtasalati og geitaosti

Stórkostlega girnilegt. Kristinn Magnússon

Iðunn Sigurðardóttir, yfirkokkur á Matarkjallaranum, gerði frábæra hluti í keppninni um kokk Íslands sem fram fór á dögunum. Við stóðumst því ekki mátið og fengum hana til að deila með okkur uppskrift sem við erum handvissar um að eigi eftir að slá í gegn.

Hér erum við að tala um stekta bleikju sem er með epla- og möndluflögusalsa, kryddjurtasalati, pikkluðu engifermajónesi og geitaosti. Í okkar bókum er þetta alslemma sem á eftir að trylla matargesti.

Iðunn Sigurðardóttir, yfirkokkur á Matarkjallaranum. Kristinn Magnússon

Steikt bleikja með kryddjurtasalati og geitaosti

Steikt bleikja

Heilt flak roðhreinsað og pönnusteikt upp úr smjöri og salti.

Epla- og möndluflögu-salsa

1 grænt epli
1 sítróna
10 cherry-tómatar
30 ml basil-olía
30 gr. ristaðar möndluflögur

Aðferð: Eplið er skorið í litla teninga og velt upp úr sítrónusafa, cherry-tómatar skornir í 4 hluta, basil 30 gr. og olía 100 ml unnið saman í blandara þangað til hitinn er 85°C.

Eplin, tómatarnir, möndluflögurnar og olían hitað saman og sett ofan á bleikjuna.

Kryddjurtasalat

Kerfill
Vatnakarsi
Klettasalat
Dill

Aðferð: Kryddjurtirnar eru pillaðar í hæfilegar stærðir og settar ofan á bleikjuna, ekkert mál að skipta út jurtunum fyrir aðrar svipaðar jurtir.

Pikklað engifer-majónes

100 ml japanskt mayo
30 gr. pikklað engifer (sushi engifer)
10 stk. graslaukur

Aðferð:

Engiferið og graslaukurinn er saxað smátt niður. Því er síðan blandað við japanska mayoið. Setjið fullt af litlum doppum af mayoi ofan á bleikjuna.
1/2 sítróna grilluð vel í sárið.
Í lokin er geitaostur rifinn yfir allt.
Steikt bleikja með kryddjurtasalati og geitaosti