Þetta hvítlauksbrauð er fullkomið til að bera á borð fyrir hóp fólks, og gott er ef fólkið setur ekki fyrir sig að borða með fingrunum. Þetta stórsniðuga brauð er nefnilega bakað í bitum svo auðvelt er að rífa bita af því með fingrunum. Brauðið er lungamjúkt og er hverjum bita dýft í blöndu af hvítlauk, steinselju, óreganó og sjávarsalti svo úr verður ljúffengt bragð sem tryllir bragðlaukana.
Partýhvítlauksbrauð
- 1 bolli volgt vatn
- 2 msk. sykur
- 2 tsk. þurrger
- 2 msk. mjúkt, ósaltað smjör
- 1 bolli mjólk
- 1 og ½ tsk salt
- 6 bollar hveiti
Utan á brauðið fer:
- 8 msk. bráðið smjör
- ¼ bolli fersk steinselja
- 2 msk. ferskt óreganó (ísl. kjarrminta)
- 4 hvítlauksgeirar
- 2 tsk. gróft sjávarsalt
Aðferð
- Setjið volgt vatn í hrærivélaskál. Bætið sykri og geri saman við. Hrærið með deigkróknum á hrærivélinni og leyfið svo að standa í 5-10 mínútur á meðan gerið fer að virka.
- Bætið því næst smjöri, mjólk, salti og 3 bollum af hveiti. Blandið vel saman og bætið svo seinni 3 bollunum af hveiti smám saman við og hrærið hægt saman. Hrærið í um það bil 7 mínútur, deigið ætti að klístrast við botn skálarinnar en losna auðveldlega frá hliðunum. Það á að vera mjúkt og örlítið klístrað. Þegar deigið er tilbúið má skipta því í tvo jafna hluta.
- Takið þá litla skál og blandið saman smjöri, steinselju, óreganó og skerið hvítlaukinn smátt og bætið út í.
- Takið fyrsta deigið og skerið það niður í 2-3 sentímetra bita. Dýfið hverjum bita í smjörblönduna og raðið í brauðform svoleiðis að bitarnir sitji hvor ofan á öðrum, í eins mörgum lögum og uppskriftin leyfir. Ekki gleyma að smyrja feiti inn í brauðformið fyrst. Þegar búið er að raða öllum bitunum í formið má breiða viskustykki yfir formið og leyfa deiginu að lyfta sér í um eina klukkustund.
- Á meðan fyrra deigið lyftir sér í forminu má endurtaka leikinn fyrir seinna deigið. Hitið ofninn í 175 gráður, smyrjið afganginum af smjörblöndunni yfir og stráið sjávarsalti yfir eftir smekk. Bakið því næst brauðin í 30 mínútur eða þar til þau eru orðin fallega brún.
Er hverjum bita dýft í blöndu af hvítlauk, steinselju, óreganó og sjávarsalti sem tryllir bragðlaukana.
mbl.is/gatherforbread