Heimagerður jalapeño-hummus og „pita-chips“

Ljósmynd/Berglind Hreiðarsdóttir

Í töluverðan tíma höfum við heyrt talað um fyrirbæri að nafni pita-chips eða pítusnakk án þess að hafa hugmynd um við hvað er átt. Nú erum við lokisins búin að komast að því enda ekki seinna vænna því annar hver saumaklúbbur á landinu er að missa sig yfir þessu góðgæti sem er hér útbúið af Berglindi Hreiðars á gotteri.is. Hún býr jafnframt til hummus sem á ættir að rekja til veitingastaðarins Mandí.

Það er ofureinfalt að skella í hummus. Það fer bara allt í blandarann og búmm, tilbúið til skreytingar! „Pita Chips“ eða pítuflögur eru síðan mjög góðar með hummus. Með því að taka í sundur pítubrauð, pensla með olíu, skera í þríhyrninga og baka í ofni eruð þið komin með stökkar og geggjaðar slíkar flögur!"

Ljósmynd/Berglind Hreiðarsdóttir

Heimagerður jalapeño-hummus og „pita-chips“

Pítuflögur

  • 1 pakki Hatting-pítubrauð (6 stk)
  • 150 virgin ólífuolía
  • 1 tsk. salt
  • 1 tsk. hvítlauksduft
  • 1 tsk. paprikuduft
  • ½ tsk. pipar
  • ½ tsk. sumac-krydd

Aðferð:

  1. Hitið ofninn í 200°C.
  2. Takið brauðin í sundur svo úr verði tvær þynnri sneiðar.
  3. Pískið ólífuolíu og krydd saman í skál.
  4. Penslið báðar hliðar á brauðinu með vel af olíu.
  5. Skerið síðan hvert brauð í átta hluta (eins og pizzu), raðið í ofnskúffu (það þarf tvær skúffur) og bakið í 10-18 mínútur.
  6. Brauðin eru misþykk svo gott er að taka skúffuna út eftir 10 mínútur og taka þær flögur sem eru orðnar stökkar úr ofninum en setja svo restina aðeins inn aftur.
  7. Leyfið flögunum að kólna alveg á grind áður en þið njótið þeirra.

Jalapeño-hummus

  • 2 dósir kjúklingabaunir (2 x 400 g)
  • 80 ml safi af kjúklingabaununum
  • 2 hvítlauksgeirar
  • 1 x jalapeño
  • 1 lúka af kóríander
  • 40 ml virgin ólífuolía
  • 2 msk. tahini
  • ½ sítróna (safinn)
  • 1 límóna (safinn)
  • 1 tsk. salt
  • paprikuduft, olía, pipar, srirachasósa og nokkrar kjúklingabaunir til skrauts.
  1. Skerið hvítlaukinn gróft, fræhreinsið jalapeñoið og skerið það einnig gróft niður.
  2. Setjið síðan allt saman í blandarann (geymið nokkrar kjúklingabaunir til skrauts) og blandið þar til hummusmauk hefur myndast. Það þarf aðeins að skafa niður á milli til að ná mjúkri áferð.
  3. Setjið í fallega skál og skreytið með smá olíu, baunum, srirachasósu og kryddi.
  4. Njótið með nýbökuðum flögum.
Ljósmynd/Berglind Hreiðarsdóttir
Ljósmynd/Berglind Hreiðarsdóttir
mbl.is