Uppskriftir með eplum fylgja haustinu og Berglind Hreiðars á Gotteri.is segist mikil haustmanneskja enda elski hún allt sem því fylgi; lyktina, kuldann, litina og ekki síst rútínuna. Hér deilir hún með okkur æðislegri uppskrift að eplakökumúffum sem svíkja engan.
Eplakökumúffur
12-16 stykki
Stökkur toppur
- 40 g smjör við stofuhita
- 60 g púðursykur
- 50 g hveiti
- ½ tsk. kanill
Aðferð:
- Setjið allt saman í skál og myljið saman með fingrunum svo úr verði mulningur til að setja ofan á deigið á eftir. Leggið til hliðar á meðan þið útbúið múffurnar.
Múffur – uppskrift
- 2 epli
- 150 g sykur
- 120 ml hunang
- 120 ml súrmjólk
- 120 ml ljós matarolía
- 2 egg
- 2 tsk. vanilludropar
- 80 g Til hamingju-tröllahafrar
- 300 g hveiti
- 2 tsk. lyftiduft
- 2 tsk. kanill
- ½ tsk. salt
Aðferð:
- Hitið ofninn í 175°C.
- Afhýðið eplin og skerið smátt niður (ég var með eitt grænt epli og eitt „pink lady“), setjið í stóra skál.
- Hellið sykri, hunangi, súrmjólk, olíu, eggjum og vanilludropum yfir eplin og blandið saman við með sleif.
- Næst má blanda tröllahöfrunum saman við og að lokum fer hveiti, lyftiduft, kanill og salt í skálina.
- Blandið öllu saman með sleif og setjið deigið síðan í zip-lock-poka til að auðveldara sé að skipta því í formin (eða notið ísskeið).
- Setjið pappaform í álform. Ég var með upphá pappaform og ákvað því að hafa færri og stærri kökur en það má hafa hefðbundin pappaform og skipta niður í fleiri einingar.
- Þegar þið eruð búin að skipta múffudeiginu niður í formin má setja kurlið ofan á og baka í 25-30 mínútur.
- Best er að baka þar til prjónn kemur nokkuð hreinn út, allt í lagi að það sé smá kökumylsna á endanum en ekki blautt deig.
Ljósmynd/Berglind Hreiðarsdóttir