Silungur með hnetusósu

Upplagt að búa til sósuna daginn áður eða fyrr um daginn þar sem hún verður bara betri við að standa aðeins. Fyrir þá sem vilja spreyta sig á púrrusnakkinu er fínt að búa það líka til nokkru áður.

Silungur og fleira

• 1400 g silungur/lax
• Púrrulaukur/vorlaukur

Skraut: T.d. ferskt kóriander, púrrulaukur/vorlaukur, límóna, tómatar, gúrka og muldar salthnetur

Hnetusósa

• 5–6 hvítlauksrif
• 2 skalottlaukar – skornir gróft
• 1 rauður chilipipar
• 1 tsk. paprikuduft
• 1 tsk. kummin
• 1 tsk kóríander
• 3½ msk. sojasósa
• 1 msk. fiskisósa (Fish Sauce – t.d. frá Thai Pride)
• safi úr 2 límónum
• 2 msk. hunang
• u.þ.b. 3 msk. engifer – rifið
• 1 tómatur – vel þroskaður
• 200 g hnetusmjör – gróft
• 250 ml kókosrjómi
• Saltflögur og nýmalaður pipar

Hnetusósa

1. Allt hráefni nema hnetusmjörið og kókosrjóminn sett í matvinnsluvél eða öflugan blandara og maukað smátt.
2. Hnetusmjörið sett í pott ásamt blöndunni og hitað – hrært saman (Tilvalið að skola blandarann/matvinnsluvélina með því að hella aðeins af vatni í hann og blanda í andartak – hella því svo í pottinn)
3. Þegar þetta hefur blandast vel saman er kókosrjóma bætt við og suðan látin koma upp. Mikilvægt er að hræra oft og reglulega svo sósan brenni ekki við botninn. Þegar suðan er komin upp dökknar sósan aðeins. Ágætt að láta sósuna standa og jafna sig í 1–2 klukkustundir eða í lokuðu íláti í kæli í 1–2 sólarhringa (ekki nauðsynlegt)

Silungur og fleira

1. Silungur settur á álbakka eða pönnu sem þolir að fara á grillið. Gott að bera olíu á bakkann/pönnuna áður.
2. Grillið látið ná góðum hita og silungurinn grillaður í 10 mínútur (ef notaður er lax þarf að hafa hann lengur, þar sem bitinn er oftast þykkari.)

Púrrusnakk: Ofninn stilltur á 180–200°C (yfir- og undirhita). Fjarlægið visnaða hlutann af græna hluta púrrulauksins (vorlauksins). Skerið græna hlutann af og skolið. Svo eru blöðin þerruð og pensluð með sataysósunni. Blöðin eru sett í ofnskúffu (bökunarpappír settur í botninn). Góður litur látinn koma á blöðin – frekar dökkur. Borið fram með fiskinum.

Meðlæti: Mér og börnunum finnst voða gott að hafa ramen-núðlur með þessum rétti. Hrísgrjón passa líka mjög vel með en svo er ómissandi að bera fram ferskt kóríander, gúrkubita og límónubáta sem hver og einn kreistir úr yfir réttinn. Ferskar púrru- eða vorlaukssneiðar og púrrusnakkið er einnig fallegt og gott með. Grillað grænmeti spillir svo ekki fyrir.