Matur | mbl | 21.5.2023 | 11:00 | Uppfært 11:56

Ómótstæðilega góð ommeletta toppuð með sprettum

Ómótstæðileg ommeletta toppuð með ferskum sprettum. Ljósmynd/Aðsend

Ef þig langar að galdra fram morgunverð eða hádegisverð á örskammri stundu sem er bæði saðsamur og góður er ommeletta málið. Hægt er að leika sér með alls konar ljúfmeti í ommelettu og hver og einn getur valið það sem honum finnst best í ommelettu. Hér er ein ómótstæðilega góð ommeletta þar sem grænmetið fær að leika aðalhlutverkið. Svo er galdurinn að setja nógu mikinn ost á ommelettuna, en bráðinn ostur er veislukostur. Til að toppa ommelettuna þá eru ferskar sprettur ómótstæðilega góðar á ommelettu auk þess sem þær gera ommelettuna svo fallega. Uppskriftin miðast við eina stóra ommelettu.

Ommeletta með grænmeti og ferskum sprettum

3 egg
¼ dl rjómi (má sleppa)
½ rauð paprika, smátt skorin
½ græn paprika, smátt skorin
1 stk. vorlaukur, smátt skorinn
Rifinn mozzarella ostur eftir smekk
Salt og pipar eftir smekk
Ólífuolía eða smjör til steikingar
Ferskar sprettur að eigin val, ef ekki er hægt að fá sprettu má nota ferska steinselju (fást hjá Vaxa og Aldingróðri)

Aðferð

1. Byrjið á að hita ólífuolíu eða smjör á meðal stórri pönnu.

2. Pískið saman egg ásamt rjóma ef vill. Má sleppa rjómanum.

3. Setjið papriku og vorlauk á heita pönnuna og létt steikið.

4. Hellið eggjablöndunni yfir grænmetið á pönnunni og látið steikjast.

5. Sáldrið yfir ommelettuna mozzarella osti eftir smekk á meðan hún er að steikjast.

6. Steikið þar til ommelettan hefur tekið sig.

7. Brjótið ommelettuna í hálfmána og setjið á disk.

8. Toppið ommelettuna með ferskum sprettum að eign vali

9. Berið ommelettuna fallega fram og upplagt er að bjóða upp á franskt Dijon sinnep með.