Gleðin var í fyrirrúmi við opnun Vínstofunnar á Friðheimum

Stórglæsilegt opnunarhóf var um helgina þegar Vínstofan á Friðheimum í Reykholti var opnuð með pomp og prakt og klippt var á borðann. Margt var um manninn og fjöldi fólks lagði leið sína og samfagnaði og skálaði með fjölskyldunni í tilefni þess. Knútur Rafn Ármann og Helena Hermundardóttir eigendur Friðheima ásamt börnum og tengdasyni hafa staðið í ströngu síðustu misseri ásamt fríðu föruneyti til að láta drauminn rætast og opna Vínstofuna sem er með eindæmum glæsileg og fellur vel að umhverfinu og hugmyndafræði fjölskyldunnar. 

Skarta þyngsta bar Íslands

Gleðin var í fyrirrúmi og léttur jazz ómaði um vínstofuna og framreiddar voru glæsilegar veitingar í anda Friðheima og fjölskyldunnar. Vínstofa Friðheima er í einu af elstu gróðurhúsum fjölskyldunnar og hefur tekið miklum breytingum í sátt við umhverfið og rómantíkin svífur yfir. Falleg vintage húsgögn prýða Vínstofuna og þar er meðal annars að finna þyngsta bar Íslands sem skartar sínu fegursta.

Dóróthea Ármann og Kristján Geir Gunnarsson, dóttir þeirra Knúts og Helenu og hennar maður munu sjá um rekstur Vínstofunnar og horfa björtum augum til framtíðarinnar. Vínstofa Friðheima er vín- og vinnustofa þar sem áhersla er lögð á gæðavín og létta rétti, vínseðillinn spannar akkúrat núna 17 blaðsíður og fer ört vaxandi. Vínstofan er hugsuð sem staður þar sem heimamenn og gestir geta komið saman og spjallað, fengið sér góðan drykk, gluggað í bók eða unnið. Þarna eru líka þrjú fullbúin fundarherbergi, tilvalin fyrir alls kyns fundi, vinnustofur og námskeið og með haustinu hyggjumst við nýta þau í vín- og matarupplifun með sögustund, sem passar vel fyrir einstaklinga og litla hópa. Að lokum þjónar Vínstofan hlutverki viðburðahúss og við stefnum á að halda alls kyns skemmtilega viðburði, t.d. tónleika, uppistand svo fátt eitt sé nefnt.

Vínstofan er opin alla daga frá klukkan 13.00 til 22.00.