Helga Magga með nýjasta trixið sitt, lasanja-súpu sem hún lagar á augabragði.
Samsett mynd
Hér er á ferðinni frumleg og ótrúlega einföld súpa sem kemur úr smiðju Helgu Möggu heilsumarkþjálfa sem er sniðugri en flestir að útfæra ótrúlega einfalda rétti. Þetta er lasanja- súpa sem á vel við á köldum vetrardögum og er ekta fjölskyldumatur.
Lasanja-súpa
- 1 msk. olía
- 150 g laukur (einn laukur)
- 2-3 hvítlauksrif
- 500 g nautahakk
- 400 g niðursoðnir tómatar (1 dós)
- 660 g pasta-sósa (1 dós)
- 170 g tómat-púrra
- 150 g kotasæla
- 35 g parmesanostur
- 900 g kjötsoð, ein ferna
- 250 g lasanja-plötur
- 1 tsk. salt, pipar og timian eða eftir smekk
- Fersk basilíka
- Kotasæla og parmesanostur til hliðar
Aðferð:
- Byrjið á því að skera lauk og hvítlauk smátt og steikið upp úr olíunni.
- Bætið hakkinu út í pottinn og kryddið með salti, pipar og timian.
- Bætið því næst sósunum út í pottinn, maukaðri kotasælunni og svo kjötsoðinu.
- Rífið niður parmesanostinn yfir og blandið við súpuna.
- Gott að setja smá ferska basilíku yfir.
- Að lokum brjótið þið lasanja-plöturnar niður í bita og bætið út í pottinn.
- Látið malla á miðlungs hita í um 20-30 mínútur eða þangað til pastaplöturnar eru tilbúnar. Ef ykkur finnst súpan vera of þykk er gott að bæta smá vatni út í hana.
- Berið fram með maukaðri kotasælu til hliðar og parmesanosti eftir smekk.