Hugvitsamleg barnaherbergi

Flesta fagurkera dreymir um að búa börnum sínum falleg barnaherbergi. Æskilegast er að þar fari saman góð nýting á rými, glaðlegir litir eða eitthvað sem örvar ímyndunarafl barnsins. Herbergið þarf alls ekki að vera stórt og oft er nóg að stúka af lítið rými ef að íbúðin er lítil. Það er því ekki stærðin sem skiptir máli heldur gæðin. Í litlum rýmum ríður á að nota hugvitið og þar koma kojur að góðum notum. Þá er hægt að hafa svefnrými barnsins í einhverri hæð og nýta síðan rýmið sem myndast undir rúminu fyrir skrifborð, leiksvæði eða annað.

Mikilvægt er að hafa góðar hirslur svo að allt eigi sér sinn stað. Hægt er að fá sniðugar lausnir í verslunum á borð við IKEA, auk þess sem gömul húsgögn má endurnýta með því að mála þau (ef þess þarf) og nota sem hirslu í barnaherbergi. Því glaðlegri sem litapallettan er því ævintýralegra verður herbergið.

Málning er besti vinur fagurkerans enda má vinna kraftaverk með pensil í höndunum. Hægt er að mála munstur á vegginn, eða, ef viðkomandi er flinkur, mála hreinlega myndir á vegginn sjálfan.

Rúsínan í pylsuendanum er svo ef að einhver í fjölskyldunni eða góður vinur er flinkur smiður. Þá eru fagurkeranum allir vegir færir. Á meðfylgjandi myndum má sjá falleg barnaherbergi þar sem ýmsar sniðugar hugmyndir hafa fengið að njóta sín og útkoman er eintaklega góð.