Notalegt sveitasetur Clooney-hjónanna

Amal Clooney prýðir forsíðu maíútgáfu Vouge. Um leið og fólk fær að skyggnast inn í líf mannréttindalögfræðingsins í viðtalinu er hægt að fá nasasjón af sveitasetri Amal og George Clooney í Englandi þar sem myndirnar af Amal eru teknar. 

Hús þeirra stendur á lítilli eyju, Sonning Eye, í ánni Thames en húsið keyptu þau í kringum brúðkaup sitt árið 2014. Í viðtalinu kemur fram að hjónin hafi eytt hveitibrauðsdögunum í húsinu og þá voru þau ekki búin að koma sér jafn-vel fyrir og nú. 

Clooney-hjónin hafa virt stíl hússins en húsið er frá 18. öld og er enginn Hollywood-bragur á heimilinu. Teppi og gamlir munir prýða húsið. Blaðamaður Vogue lýsir því þannig að þegar komið er inn sé stofa með mjúkum stólum, sófi og arinn. Stofan sé skreytt með fjölskyldumyndum og myndum af hjónunum með merku fólki eins og Barack Obama og páfanum. Í hinu herberginu má meðal annars finna gamalt kort af Berkshire, gamlar bækur og málaða mynd af hundi leikarans. 

Í húsinu eru skrifstofur þeirra og á lóðinni má finna lítið fallegt gróðurhús þar sem eru ræktuð sítrónutré. Í garðinum er síðan sundlaug og garðhús, þar er setustofa sem er notuð þegar fólk kemur í veislur til hjónanna. Þar skemmtir það sér meðal annars við að taka myndir af sér í ljósmyndaklefa sem prentar myndir. 

• Blogga um frétt