Litafyrirtækið Pantone er búið að velja lit ársins 2019 en að þessu sinni varð liturinn „Living Coral“ fyrir valinu en hann má finna undir litanúmerinu PANTONE 16-1546. Um er að ræða rauðbleikan lit sem ætla má að verði áberandi á næsta ári.
Í fyrra varð fjólublár litur fyrir valinu og grænn þar á undan. Litaval fyrirtækisins hefur mikil áhrif á tískustrauma ekki bara hvað varðar innanhúshönnun heldur líka farða og fatnað.
Pantone segir litinn vera líflegan en á sama tíma mildan. Segir fyrirtækið um val sitt að nærandi liturinn geti veitt vellíðan og gleði í stöðugt breytilegu umhverfi. Er þetta að vissu leyti svar við tækninni og samfélagsmiðlum sem taka sífellt meira pláss í okkar daglega lífi. Er hann tákn um meðfædda þörf okkar fyrir jákvæðni og gleði.
Ef þú ert ekki í stuði fyrir að mála stofuna í þessum lit geta til dæmis púðar eða aðrir aukahlutir í litnum lífgað upp á heimilið.