Þótt Wabi-sabi hugmyndafræðin komi upprunalega úr japanskri heimspeki og tákni fegurðina í ófullkomleikanum – þá má sjá alls konar útfærslur af þessari hönnun um víða veröld um þessar mundir.
Cleo Scheulderman er sem dæmi listrænn hönnuður búsettur í Berlín sem þykir með einstaka hæfileika í að færa þetta ófullkomna listform inn á alls konar heimili. Hún notar mikið af ljósum jarðlitum, viði og hráum flísum. Hefur hlutina inn á heimilinu vanalega fáa og í stórum grófum stíl.
Blóm eru í öndvegi og húsgögn sem eru komin til ára sinna eða hrá náttúruleg efni sem eru sett upp á vegg eða notuð fyrir húsgögn. Að þessu leyti þykir hönnunarstefnan mjög umhverfisvæn og skemmtileg. Heimilin verða eins ólík og þau eru mörg, í stað þess að fólk hópist í sömu búðirnar að kaupa sér allt eins.
Wabi-sabi-eldhús eru vanalega þannig að leirtauið er haft uppi á borðum og passar það vanalega við veggi, hillur og húsgögn í kring.
Það er engin ein leið að útfæra þennan hráa fallega stíl inni á heimilinu en eitt er víst, að heimilið virkar mjög friðsamt og notalegt. Enda af hverju að eiga fullkomið heimili – þegar fegurðina er að finna í ófullkomleikanum?