Það var stuð og stemmning í útgáfuboði Kristínar Jórunnar Hjartardóttur og Egils Eðvarðssonar sem gáfu út bókina Fær í flestan sjó nú á dögunum. Í bókinni má finna fróðleik og hagnýtar leiðbeiningar fyrir sundfólk sem langar að upplifa náttúrusund á Íslandi. 

Kristín hafði stundað sjósund í heilsubótarskyni í nokkur ár þegar hún ákvað, í tilefni af sextugsafmæli sínu, að synda á sextíu mismunandi stöðum á landinu. Við tók stórskemmtilegt ár þar sem hún og Egill eiginmaður hennar ferðuðust um Ísland þvert og endilangt – hún synti í sjó, ám og vötnum en hann skrásetti ferðalagið í myndum. Þegar upp var staðið voru þau búin að kynnast 82 ógleymanlegum sundstöðum.