Margt var um manninn þegar Vængjaþyt vonarinnar var fagnað á þriðjudaginn. Í bókinni fjallar Margrét Dagmar um son sinn Kela. Margrét lýsir glímu fjölskyldunnar við erfiðleika sem virtust óyfirstíganlegir, hún lýsir beint frá hjartanu sársaukanum og sorginni en líka gleðinni og sigrunum – og því hvernig vængjaþytur vonarinnar hvarf henni aldrei.

Kvikmyndaleikstjórinn Friðrik Þór Friðriksson lét sig ekki vanta í útgáfuboðið en hann leikstýrði einmitt Sólskinsdrengnum sem fjallar um sögu Kela og kom út árið 2008. Leikkonan Kate Winslet talaði inn á ensku útgáfuna og eru þær Margrét Dagmar enn svo góðar vinkonur í dag að Winslet mælir með bókinni. „Þú breyttir lífi mínu,“ skrifar Titanic-leikkonan á kápuna.

Fyrrverandi forsetafrú Íslands, Frú Dorrit Moussaieff, mælir einnig með bókinni. „Hetjusagan um Margréti; konuna sem barðist fyrir son sinn; opnaði dyr sem allir töldu lokaðar; saga sem snart hjarta mitt; mögnuð og hrífandi. Lestur bókarinnar gerir okkur að betri manneskjum,“ skrifar Dorrit.